РИО 2016
Хүн төрөлхтний эв найрамдлын бэлгэ тэмдэг олимпийн наадам XXXI дэх удаагаа Бразилийн Рио Де Жанейро хотноо 2016 оны 08 дугаар сарын 05-21-ний өдрүүдэд зохион байгуулагдсан. Тус наадамд Монгол Улсаас түүхэндээ хамгийн олон буюу 43 тамирчин спортын 7 төрлөөр оролцсон. Наадамд 206 орны 10500 гаруй тамирчид медалийн төлөө хүч, ур чадвараа сорьсон бөгөөд Цагдаагийн байгууллагаас 8 алба хаагч спортын 5 төрлөөр оролцсон.
Хорооны дасгалжуулагч, цагдаагийн дэслэгч, Монгол Улсын гавьяат тамирчин М.Уранцэцэг жүдо бөхийн эмэгтэйчүүдийн 48 кг-ийн жинд шагналт 5 дугаар байр, туслах дасгалжуулагч, цагдаагийн ахлах ахлагч, ОУХМ Б.Түвшинбат боксын 69 кг-ийн жинд 9 дүгээр байр, туслах дасгалжуулагч, цагдаагийн дэд ахлагч, ОУХМ Н.Золбоо чөлөөт бөхийн 125 кг-ийн жинд бэлтгэл хангагчаар;
Сонгинохайрхан дүүрэг дэх цагдаагийн нэгдүгээр хэлтсийн хэв журмын офицер, цагдаагийн ахмад Ц.Мөнхзаяа жүдо бөхийн эмэгтэйчүүдийн 63 кг-ийн жинд шигшээ 16 дугаар байр;
Төмөр зам дахь цагдаагийн хэлтсийн хэв журмын цагдаа, Монгол Улсын гавьяат тамирчин О.Насанбурмаа чөлөөт бөхийн эмэгтэйчүүдийн 69 кг-ийн жинд 5 дугаар байр;
Төв аймаг дахь цагдаагийн газрын эргүүлийн цагдаа, цагдаагийн ахлах ахлагч, ОУХМ Ц.Мөнхзул спорт гар бууны 25 метрийн дасгалд нийт 60 сумаар буудаж 580 оноогоор 11 дүгээр байр;
Чингэлтэй дүүрэг дэх цагдаагийн нэгдүгээр хэлтсийн эргүүлийн офицер, цагдаагийн ахмад, Монгол Улсын гавьяат тамирчин Б.Сэр-Од эрэгтэйчүүдийн марафон гүйлтийн уралдаанд 2:24:26 секундын амжилтаар 92 дугаар байр, Сүхбаатар дүүрэг дэх цагдаагийн нэгдүгээр хэлтсийн хэв журмын цагдаа, цагдаагийн ахлах ахлагч, ОУХМ Л.Отгонбаяр эмэгтэйчүүдийн марафон гүйлтийн уралдаанд 2:45:55 секундын амжилтаар 85 дугаар байрын амжилтыг тус тус үзүүлсэн.
Хороон дарга, цагдаагийн дэд хурандаа Б.Пагва нь олон улсын жүдо бөхийн холбооны шугамаар тус наадамд зохион байгуулах комисс, сахилгын хороонд ажилласан.